كنقدم لكم اسهل سلطة المقرونة و الخضر المشكلة كتجي
هائلة فالمنظر و لذيذة فالمذاق لي ذاقها
كتعجبو وساهلة في التحضير
مقادير اسهل سلطة المقرونة و الخضر المشكلة
مطيشة مقطعة طويلة بحال في الصورة – الذرة – سومون مدخن –
كروفيط – زيتون اسود مقطع – بيض مسلوق نسيت مصورتو –
خضر مشكلة مقطعة صغيرة ومسلوقة انا كنشريها جاهزة –
علبة التون – مودزاريلا – فرماج مقطع مربعات
طريقة تحضير السلطة
كاناخذو شعرية بهاد الفورمة كتجي حسن نسلقوها في الماء
ونسقطروها في شي شبكة ونخويو عليها ماء بارد ونخليوها
الوقت الكافي حتى يتحيد منها الماء
من بعد كنحطو فوقها المقادير التالية
الذرة – علبة تون بالزيت ديالها – زيتون – الخضرة – والفرماج
كنخلطو الكل مزيان ونديرو الملحة والخل او لاصوص الجاهزة ديال
السلطة منديروش الزيت حيت الطون فيه ديجا الزيت
ونفرغو في طبق التقديم ونزوقو بمطيشة والبيض في الجناب
والسومون نلفوه على شكل وردة ونزوقو بيه في الوسط
والكروفيط نوزعوهوم على كامل الطبق والمودزاريلا
حتى هي في الوسط وشوية القسبور يابس من الفوق
وها لالة مولاتي السلطة واجدة
نتمنى تجربوها لانها فعلا لذيذة
بالصحة و الراحة